तुम छा परदेशी तुमकें बेटा खबर नि छू
आजकल ब्वारियों कें सासु डर नि छू
सासु कें झुकण पड़ल बवारिक खुट में
य बात में च्यला के अगर मगर नि छू
मुखड़ उज्याव पट क्रीम पौडर लगै भेर
मन आज भोव ब्वॉरियोंक ग्वर नि छू
टिकुलि बिंदुली साड़ी बिलौज मिजात
बांज घा ल्यौणी ब्वॉरियोंक ख्वर नि छू
कठिन हगे पोथा जिंदगी उत्तराखंड में
य दिल्ली बंबई कलकता शहर नि छू
पुर उतरखंडक इजा यसै छू हाल के हों
सुख शांति वाल य टैम में एक घर नि छू
दै दूध गाई छां देखनू हम आब स्वैणों में
धिनाई नाम पर घरों में एक थ्वर नि छू
दरप दाहा में ख़तम छू आजकल पहाड़
गों इलाक छोड़ इजा आपण स्वर नि छू
कोई टिप्पणी नहीं:
एक टिप्पणी भेजें