कम्पनी वाल कर दिनी अणकसी काव् ,
तीन रुपैं चिप्स में भरनी सात रुपै हाव् |
रैपर में काजू बदाम भीतर ढूढण पडौं ,
दाज्यू इनार चक्कर में खिम्मू दुकानदार कैं जै सुणण पणौ ||
------------
हर तीन म्हैण में रेट बढै दिनन
हर तिसार दिन भीतरक माल घटै दिनन |
हात पुजन नै खाप् खाली पैकेट सुंघण पडौं ,
दाज्यू इनार चक्कर में खिम्मू दुकानदाल कैं जै सुणण पडौं ||
----------------
सात ग्राम क पैकेट में लेखनन तैतीस परसेन्ट फिरी ,
एक पैकेट लूछला दूसर जां चिरी
फिर स्टेपलर लगै बेर पैकेट सिणण पडौं
दाज्यू इनार चक्कर में खिम्मू दुकानदार कैं जै सुणण पडौं ||
-------------------
तुरतुरे सुरसुरे टेडा मेडा सोया अनाप सनाप
रंगील चंगील पैकेट खायो पेट खराब
नानतिन जिद करनी फिर झुकण पडौं
दाज्यू इनार चक्कर में खिम्मू दुकानदार कैं जै सुणण पडौं ||
---------------------
लोग रैपर खेडि दिनी चिप्स खैबेर
नालि में बुज लागि जां गन्दगी ढेर
फिर यो नुकसान सबन कें भुगतण पडौं
दाज्यू इनार चक्कर में खिम्मू दुकानदार कैं जै सुणण पडौ ||
#विनोदपन्त_खन्तोली
कोई टिप्पणी नहीं:
एक टिप्पणी भेजें