😟 पढ़ीं - लेखीं बिरोजगार 😟
आर गयूं पार गयूं...
गाड़ - गध्यार गयूं..
इसीकैं डोई रयूं..
सबहूं बौई रयूं..
कि करूं हो तौई रयूं..
दाज्यू..मीं बिरोजगार भयूं ।
यां चां.… कभै वां...
दौड़ि जां.. धां धां...
आजि तलक त मिली नां..
नौकरी , हमुंहूं छई कां...
ज्ञानोक् त मीं भंडार भयूं.….
दाज्यू.. मीं बिरोजगार भयूं ।
एकल कौ एक काम कर..
कर्जाक् थ्वाड़ इंतजाम कर.
नानीं... ले के दुकान कर..
द्वी डबल आला घर ।
कर्ज लीबेर कर्जदार भयूं ..
दाज्यू... मीं बिरोजगार भयूं ।
कर्जाक आगोश में..
डुबि गयूं होश नैं..
मन चित में जोश नैं..
कैकैं द्यूं दोष मैं..
तिरसंकु जस लटकि गयूं.…
दाज्यू .. मीं बिरोजगार भयूं ।
आन नैं के मान नैं..
कैं ले जाऊंत के सम्मान नैं..
ठुलि के पछ्याण नैं..
म्यार तर क्वे चाण नैं ..
अटकि जस मझधार गयूं..
दाज्यू.. मीं बिरोजगार भयूं ।
म्यार जतू ले यार छन्...
सब्बै दुकानदार छन्..
माँख ले नीं ऊंन दुकान पन्..
क्याले चुकूं ब्याज धन् ।
मीं दुनीं में भार भयूं..
दाज्यू ...मीं बिरोजगार भयूं ।
अशोक कुमार पंत
( अभ्यासी )
कोई टिप्पणी नहीं:
एक टिप्पणी भेजें