थानबासि रया .....
थानबासि रया नेताज्यू
दिल्ली देहरादून में |
झन फरकिया पहाडन ,
जेठ चौमास ह्यून में ||
हम गाड बगूं या तर जाऊं ,
बीमार हैबेर डोली में मर जाऊ
तुम अफसरनैकि मिटिग लिया
वैं बटी स्मार्टफून में |
थानबासि रया नेताज्यू ,
दिल्ली देहरादून में ||
घसारिन खै जाओ दिनै में कुकरी बाग
नानतिनन टिपि लिजाओ कर दिओ एकै गास
चार आंसू लफै दि हालिया
हमार मरण ज्यून में |
थानबासि रया नेताज्यू
दिल्ली देहरादून में ||
खडि बजरी खंणी जाओ,दरक जान् सारै पहाड
गौंन में पैर ऐजौ सडकन मे ऐजौ गाड
तुम पहाड कें छांणि खाया ,
ढोव खां जसि ग्यून कैं |
थानबासि रया नेताज्यू
दिल्ली देहरादून में ||
चुनावन मे खुट पकडिया
गधा छें ले कया बाब्
जिति बात खैखान हैजाया
साक्कै बाब् कें दिया ध्वाक |
तुम कुरसी लै बादि रया
हव-भान जसिके हयून में
थानबासि रया नेताज्यू
दिल्ली देहरादून में ||
#विनोद_पन्त_खन्तोली
कोई टिप्पणी नहीं:
एक टिप्पणी भेजें